“Uli pidan ake sing pati demen mebalih tipi (TV) kerane acarane sing ade cocok amun kenoe” keto omong I Bulit di jengkuwunge nutur ajak timpalne madan I Degug. “Kuale jani ake ketagian mebalih berita ane tiap jam nto” terus iye nolih timpalne. “Adi keto ?” I Degug metakon. “Ba cai sing nawang kangin kauh, kene sube jeleme sing ngelah tipi, sing nawang berita hangat !”
“Not beritane cara janine Bapak-Bapake selegenti menek, ade ane tudinge korupsi, terus ane tudinge galak, sing ngaku, tur madingang pesan, ane nuding masi oraange korupsi” keto ngelantur omongne I Bulit sing pegat-pegat cara mimis bedil otomatis. Yen icang ngenoang, saja cara munyin I Bulit, Bapak-Bapake ane ipidan jemet gati kampanye, mesima krama, mebakti, medana punia, nulungin anak tiwas sakit sing ngidaang mubad ke rumah sakit, mejanji ken rakyate lakar ngaenang jagate rahayu, tur janji-janji lenan, yeh jani, disubane dadi Bapak, adi iye ane korupsi, kalingan te melanin rakyat. Japi je timpal-timpalne ane korupsi sube liu masuk bui, kuale adi sing takut iye milu korupsi, dikengkene gedenan bin pipis rakyate ane juange. Mebalih berita tipine jani cara mebalih satua sinetron bersambung, ade ane ngedegin, ade ane suryakin, ade ane pedalem, beh megenep hiburane tepuk. Irage rakyate ane tiwas dong sube kilang-kileng cara siape sambuin injin, sing ngelah daya.
Taen icang maca di internete ade tulisanne Ida Bhagawan Dwija mejudul : Bobabe perlu, juarine kanggo. Adi cocok gati isin tulisane ento ajak kelus gumine cara jani. Anake bobab, dueg gati ngilidang bobabne sada nyambat-nyambat Tuhan. Yen cara Baline nto adanne mapuate : apang salaang Dewa, apang sing selamet pitung turunan, bani mati, liu buin puatane cara ento. Anake bobab pasti juari, kerane yen sing juari ato lek-lekan, sing ngidaang ye bobab. Amun mara melajah bobab, jumah di mekane mesuluh, tingalin lawat sebenge, apang anake ane bobabin sajan-sajaan ngugu. Yen dikengkene arus mesebeng galak, ngomong apang lancar, de takut-takut, nengneng matan anake ane ajak ngomong ato kamerane. Amun deweke luh, melajah ngomong ane ngedalem, apang ngidaang sigsigan, mesuang yeh mata, yeh cunguh, pepesin ngelap yeh matane aji tisu. Masi de sapine nyambat adan Tuhan, mepuata.
Keto ane tepukin di tipine, dadinne icang sing je ngeresepang unduk ato satua, kewale nelektekang kenken ye carane iye “beracting” keto bahasa Inggrisne. Saja gati omong I Bulit, icang ke jani demen mebalih tipi, dot ningalin kenken sebeng anake bobab tur juari pongah.
Recent Comments