Mare jam pat das lemahe peken Banyumalane sube rame, tuah je dinane ento purnama, anake liu meli kar banten anggona merainan. I Kuncung gegaenne dadi sopir angkot jurusan Banyumala – Sangket, puih ping kuda kaden iye ngajangin dagang uli jam duane kanti jam pat jani. Mare iye merase seduk, terus kaukine ken timpal-timpalne peturu sopir angkot “Cung, mai malu, cai care sing inget ken timpal mare liu maan muatan ! ” keto I Bagler ngaukin sambilange nyiup kopi.
“Nyen ngoraang ake engsap metimpal, ake mare ukane ngalih kopi not matan icange kuneng-kunengan” I Kuncung mesaut sambilange ngalih tegakan di durin dagang kopine. “Too, too, too, belerne I Kuncung ngalih tongos di durin jit dagange” I Bagler metadah iriati kerane uli tuni jatinne iye dot masi negak ditu, kuale sing bani, nyanan temaine ken dagange. Ngon I Bagler ken wanenne I Kuncung, pantes be iye liunan maan muatan, kerane jelemane lagas buin enggal maan timpal.
“Oraang je cai dot negak dini, o keto Luh ?” I Kuncung metakon ken dagange sambilange nyolek jit. “De cai ngendah-ngendah dini nyen keseduh polonne, tawang ake sube ade ane ngelaang” “Naaah ketoang be Luh, apang kapok polonne I Kuncung nyolek-nyolek jit” pesaut I Bagler girang, kerana misi kenehne ngae lek I Kuncung. “Keto masi cai Gler, yen bani cai ngendaang awake, nyanan taanang gemelan somah ake di pelengan caine” I Luh mesaut sengitan.
“Uuuut, uuuut, uuuut, tidik cai Gler” I Kuncung males suryakne I Bagler. “Yen ake, sai-sai nyolek jit mokoh-mokoh sing kengken, demen bin iye” I Bongkot mesaut uli joh. “Jit nyene ?” barengan mesaut I Kuncung ajak I Bagler. “Ade dogen, bine jit putih-putih” saut I Bongkot. “Nyen, dije !” nyangetang bangras I Bagler dot nawang.
I Bongkot maakang negak sambilange ngamah godoh. I Kuncung jak I Bagler gedeg gati ningalin gayane I Bongkot. “Aksin caine care makelar kasus dogen, mesebeng tampag demen melog-melog anak” I Kuncung mecegik nganti mekesiab I Luh. “Saja, ake sai-sai nyolek jit, pang salaang Bethara neh, kuale jit celeng; nto not kaden sube tawang ake megae di babah Leonge; kali jani ake be suud nampah, terus abe mai ke kiosne babah Leong. Kudang jit kaden ke gabag”
Ha ha ha ha hi hi hi hi hi hi hi hi, rame kedeke semengan kanti I Luh simpatan, bin ilang gedegne. Saget be galang kangin, mekejang ngenggalang megedi. I Luh megegampil lakar mulih kerane daganganne sube telah. Keto demene idup di Beleleng, menyame beraya cara metugelan.
Recent Comments